Logoaren historia eta jatorria

Donostia Europako kulturaren hiriburu izateko hautagaitza aurkezteko logotipoa Luisa Chillida diseinatzaile eta Eduardo Chillidaren ilobak landu du.

Donostiako Udalak 1989an enkargatutako domina lantzeko Eduardo Chillidak egin zituen prestaketa-lanetako baten erreprodukzio zehatza da Donostia 2016-ren irudia.

Marrazki bat atzera hartzen eta erreproduzitzen du logotipoak, lapitzez perfilatutako lerro fina tinta beltzez ordezten du, eta lurrari, materiari, dagokion zatia hartzera pasatzen da.

Marrazki-sail horretatik abiatuta landutako oroitzapenezko dominak Donostia du izena. Neurri txikiko urrezko pieza bat da, Chillidak bere herriari oparitua.

Bestalde, lapitzezko marrazkiak zein dominak Eduardo Chillidaren beste lan batzuetarantz bideratzen gaitu formalki eta kontzeptualki. Artistaren ezaugarri diren formen garbitasuna eta esentziaren berreskuratzea nabarmentzearen bidez antzematen da hiriaren soslaia. Muga-kontzeptuaz eta eskultorearen espazioaren ikuskeraz ari zaizkigu piezak espazioarekiko haren elkarrizketa betierekoan. Donostiarekin, eta bereziki badiarekin eta horren inguru geografikoarekin, zuen zuzeneko eta barru-barruko harremana ere aipatzen digute.

Haren ibilbide artistiko osoan ageri den funtsezko gaia izan da natura. Itsasoak, olatuek, haizeak, eta gizakiak, naturaren indarrei eta haren dimentsioari aurre eginez, markatzen dute batez ere bere eskulturgintza. Haize orrazia eratzen duten altzairuzko hiru piezak, arroken gainean hiriaren mugan itsasoari galdezka jarriak, bilatze-prozesu horren osagaiak dira.

Bibliografia

BARAÑANO, Kosme: Chillida. Medallas. La orfebrería de Eduardo Chillida. IVAM Argitaletxea, Valentzia, 2004.

“... Chillidak baieztatzen du geografia-inguruneak ematen diola artistari ez soilik materiala baizik eta, batez ere, bere eskulturgintza osoaren gaia kokatzeko ingurua 1984tik: mugak eta haien arteko lotura, giza eskala. Euskal badiako maskorraren, hango islaren eta kaien espazio horretan, itsasoa eta lurra, forma eta hartzen duen itxura, ikusten irakasten digu Chillidak, baina, bereziki, denbora espazioaren dimentsio bat dela ulertzen.”

CHILLIDA, Eduardo: Preguntas. Ed. Real Academia de Bellas Artes de San Fernando, Madril, 1994.

“Zer dago itsasoaren eta nire begiratzearen atzean? Zer dago itsasoaren eta nire entzutearen atzean?”